由大館主辦，並由音樂社企「一個人一首歌」策劃及製作的社區藝術計劃《記不起一個人，哼得出一首歌》，展演此計劃為「腦退化症」所共創的歌曲，以藝術角度向公眾推廣「腦退化症」的知識。是次音樂會邀來關注腦退化症的特別表演嘉賓，包括深受本地樂迷喜愛的 唱作歌手黃妍 (Cath)，二人獨立唱作組合雷同二友以及人氣新生代演員及歌手顧定軒 (Zeno)，以歌聲唱出腦退化症的喜與悲，亦為9月的「世界腦退化月」揭開序幕，提升大眾對此病症的關注！
原定於 9月2日舉行之《記不起一個人，哼得出一首歌》紀錄片放映分享會及音樂會，因受颱風影響，故大會將活動順延至9月3日(星期日)下午及晚上舉行，雖然有點倉猝，但大家都明白計劃背後意義重大，台前幕後都爭分奪秒地全力配合音樂會演出。計劃的策劃人、創作總監兼創作培訓導師、著名音樂人馮穎琪指出:「由於受颱風影響，少咗一日半的綵排時間，而這次演出涉一眾導師與家庭共同演出，所以真係同時間比賽，最後我們一起把最真摯的感覺呈現在舞台。」雖然綵排時間緊迫，但演出的歌手 Cath、雷同二友及 Zeno 騷後都大呼感動，並覺得一切都非常有意義與值得。
在音樂會上唱出《無聲浪》和《漫漫舞曲》兩首歌的Cath說：「好開心、好榮幸可以參與呢個好有意義嘅計劃，每一個疾病當社會大眾對佢認知比較少嘅時候，就會產生好大嘅恐懼，但呢個病開始越來越普遍，身邊有好多朋友都遇到呢個問題，能夠有一個機會俾有類似經歷嘅人，聚埋一齊分享共同嘅經歷，大家都會比較容易跨過去。而我自己嘅歌《無聲浪》係我寫俾同樣有腦退化症嘅婆婆，呢首歌嘅感覺比較sad，但另外一首歌《漫漫舞曲》就比較輕快，當中嘅內容帶有少少洋蔥，所以演繹時自己都幾感動。」
演員兼歌手Zeno說：「我覺得今次係一個情感好豐富嘅經歷，成個計劃由開始點樣同呢幾個家庭相處，到最後誕生咗呢幾首歌，成件事都好令人感動，剛才綵排時當演繹我所負責嘅歌《緩緩》時都有少少情緒失控，因為故仔當中嗰份真摯嘅感情好感動到我。」
二人唱作組合雷同二友說：「可以和不同的家庭溝通相處，係一個難忘經歷，同我哋合作嘅家庭，個小朋友仲送咗一個禮物俾我哋，而我哋負責嘅歌《Bed Time Story》本身都好溫馨，加上剛才見到台下嘅病友及家屬，霎時間覺得好感動，但係為咗演出要忍住唔可以喊。」
