下星期一（8日）早上10時起東亞銀行信用卡優先訂票，撲飛熱潮一觸即發。早前Sammi演唱會海報曝光，掀起全城哄動，海報大晒弗爆身材，氣勢逼人，連她本人都表示好滿意。
海報中Sammi服飾有型性感，她以全身肌肉線條完美演繹，狀態大勇。對於今次演唱會海報拍攝Sammi 非常期待，她說：「我今日心情又興奮又緊張，好希望拍到一輯好理想嘅海報，無論概念、造型、服飾、攝影，甚至耳環都好講究，帶出不一樣感覺畀觀眾，大家睇到就會明白。」她還透露事前認真做了一些功課，說：「我喺拍攝前做好皮膚護理、瞓好啲、做Mask等基本準備，今日影海報呢條裙確實有少少難著，因為剪裁特別又好多元素，有舞台感、高貴感，仲有啲Punk，一套衫有咁多元素，好特別，所以我都要做好身型管理。結果無問題，已經過咗一關啦，我好滿意！」
Sammi身材弗爆，她承認以前飲食比較節制，現在心態較隨意，不變的是堅持勤做運動。她說：「我試過168（ 每天8小時進食），甚至204（ 每天4小時進食），但有時好想食都會照食！依家我好隨心，無限定一個食嘢方式。如果需要著套衫修身啲，就飲食檢點啲，如果套衫輕鬆啲，我有時會一日食三四餐，最緊要做運動，食多啲都唔怕！」她笑言完成海報拍攝，終於可以開懷放縱一下。
對於7月紅館演唱會，Sammi十分重視每項細節，她說：「除咗唱歌部份，點樣呈現不一樣嘅演繹方式都好重要，我諗嚟睇Sammi演唱會嘅歌迷，心目中對呢方面都有要求，希望多啲嘢睇、多啲元素。服裝造型，我自己都好鍾意著靚衫，好鍾意Fashion，所以呢方面一定唔缺少。至於歌曲和音樂部份，我同基爵（音樂監製梁基爵）咁多年夾得好好，我哋都想做到多嘢聽和睇，我好鍾意一個演唱會內有不同元素，亦都係我自己做演唱會嘅方向。」
演出詳情：
AXA 安盛呈獻《You & Mi 鄭秀文世界巡迴演唱會香港站 2023》
日期：2023年7月14 至16, 18至19, 21至23日（共8場）
地點：紅磡香港體育館
時間：晚上8時15分
票價：HK$1080 / HK$680 / HK$380
主辦機構：寰亞娛樂/ 東亞娛樂
冠名贊助：AXA安盛
東亞銀行信用卡優先訂票：
優先訂票日期：5月8日（上午10時）至5月10日（晚上11時59分）
優先網上購票：www.hotdogtix.com 或 HotdogTIX 手機應用程式
注意事項：所有觀眾入場及觀看演出時必須遵守政府公佈之最新《預防及控制疾病規例》，並配合演出場地的入場安排，否則場地職員有權拒絕違規的觀眾進場。有關演唱會門票費用、客戶服務費及速遞費用，恕不退還。
